موضوع: عريـس من النّـت الجمعة 28 أغسطس 2009, 5:57 pm
الجـزء الأول
تركت عفاف الكمبيوتر الذي تقضى عليه معظم وقتها فجأة وصرخت بصوت عالى: مااااما.. يا يا ماماااااااااالأم: فيه إيه يابت بالراحة إخواتك نايمينعفاف: معلش يا ماما أصلى فرحانة.. فرحانة اوي اوي الأم: خير يا بنتى فرحينى معكاي كدا ربنا يفرح قلبك عفاف: عريس يا ماما عريس الأم فرحة: يا ألف نهار أبيض يا ألف نهار مبروك.. لولولولولولولولولولولولوى وبعد دقيقتين أحضان وقبلات تذكرت الأم: ألا قوليلى يابت.. عريس مين ده اللي هيتقدملك.. وماقلتليش من ساعة ما جيتى من الجامعة ليه؟عفاف: لأنى لسة عارفة دلوقتى حالا يا ماما الأم بإستغراب: عارفة دلوقتى حالا؟؟؟.. عارفة منين يابت ده انتى لسة قايمة دلوقتي من قدام الكبورر عفاف ضاحكة: كبورر ايه بس يا ست الكل.. اسمه كمبيوتر الأم: مش مهم.. المهم عرفتيه ازاي؟ ومين أصلا العريس ده يعنى جاى منين؟ عفاف: من النت يا ماما ظلت الأم المسكينة تنظر لابنتها باستغراب وهى تراجع كل ما تعرفه من كلمات ولم تجد لكلمة النت أثر بينها فسألت عفاف: النت ؟ ودى تبقى فين دى يا بت؟ عفاف: فين ازاى يا ماما؟ الأم: يعنى فينها من الوايلى الى احنا فيها؟.. تركبيلها مترو ولا اتوبيس ولا تأخديها تاكسى.. اوعى يابت يكونوا بيروحولها بالقطر؟ عفاف ضاحكة: ايه يا ماما الى انت بتقوليه ده؟.. مترو إيه وقطر إيه؟! ده النت الأم: أيوة يا بنتى عرفنا انه الزفت بس ده موقعه فى انه بلد بالظبط ؟ عفاف: فى كل البلاد يا ماما الأم باستغراب: انتى اتهبلتى يا بت؟.. يعنى إيه فى كل البلاد؟ عفاف: يا ماما النت ده عبارة عن كمبيوترات كتير في العالم وفيه معلومات كتير اوى الأم: معلومات ايه يابت انتى هو انتى هتتجوزى دايرة المعارف؟؟ عفاف: المهم يا ماما ان فى واحد متقدملى عن طريق النت الأم: ودة اتقدم ازاى يعنى؟؟؟؟ عفاف: بعتلى إيميل الأم فى ذهول: ايميل؟.. بعتلك إيميل جارنا المسيحى؟.. وإزاى يا بت تقبلى تتكلمى مع الى اسمه إيميل ده.. وهو مين عشان الزفت بتاعك ده يبعته لين اعفاف فى سرها طب افهمها ازاى دى بقى...؟ عفاف: يا ماما اهدى إيميل جارنا مين بس الأم: مش انتى الى بتقولى يابت عفاف: إيميل يعنى جواب بس على النت الأم: برضه هتقوليلي عالزفت.. يابنتى أنا مش فاهمة البتاع الى بتتكلمي عليه ده عفاف: النت ده ياماما حاجة فى الكمبيوتر.. ممكن نبعت فيها رسائل لناس بره ونستقبل منهم رسائل برضه ده غير حاجات كتير الأم: أنا ماليش فى الكلام ده.. اللي انا عايزة أعرفه هو مين ومعاه شهادة ولا لأ؟ واصله ايه وفصله ايه؟عفاف: هو اسمه حاتم وطالب فى هندسة حاسبات وقاطعتها الأم: طالب؟؟؟؟؟ عفاف: أيوة ياماما بس فى آخر سنة الأم: بصى أنا ماليش دعوة بالموضوع دا أنا هتصل بأبوكي وهو يتصرف.. اتصلى بيه انتى عالموبايل وأنا أكلمه.. زمانه عالقهوهوفى قهوة المعلم حسنينرن الموبايل بتاع عم حلاوة العنتبلى الجزارحلاوة العنتبلى وبصوت خشن: أيوة مين؟ الأم: أنا يا معلم العنتبلى: عاوزة إيه يا وليّه؟؟؟ الأم: تعالى يا خويا شوف بنتك جايلها عريس من النت العنتبلى: بتقولى منين؟؟ الأم: من النت يا حاج العنتبلى: يعنى إيه؟ فهمينى الأم: ياخويا لما أفهم أنا ابقى أفهمك.. تعالى انت واسألها بنفسك العنتبلى: ماشى.. هخلص دور الطاولة ده وهاجى على طول ثم أغلق الموبايل وأخذ يكلم نفسه: نت!! ده يطلع ايه ده كمان؟؟؟؟.. تكونشى الولية مراتى اتهبلت ؟؟؟؟؟.. بس هى ناقصة هبل؟ ماهيا كدا كدا مهبولة من يومها سأله صاحبه الذى يلاعبه الطاولة: مالك يا معلم حلاوة؟ انت بتكلم نفسك ولا ايه؟ فانتبه المعلم حلاوة وقال لعنتبلى: قولى يا زينهم.. بما إنك كدا متعلم ومتنور ومعاك تالتة ابتدائى.. يطلع إيه النت ده؟؟؟؟طبعا المعلم زينهم اترسم بقى وأخذ وضع فخر وعزة وهو يجيب: وإنت ايه اللي عرفك بالأشكال دى يا معلم؟العنتبلى: اهو عرفت وخلاص بقى زينهم: والله يا معلم حلاوة.. أنا سمعت مرة البت بنت أخت عمة جار خالتى بتقول انها شافت على النت صور لمذابح بتحصل فى العراق العنتبلى: ااااااااااااه.. يعنى زى تليفزيون كده يعنى زينهم: لا يا معلم مش زى التليفزيون.. وإنما تقدر تقول عليه جرايد بس بتتشاف على الكمبيوتر العنتبلى: يا دين النبى.. معقولة ياد الجرنال يدخل عالشاشة الصغيرة دى؟؟ طب بيدخلوه ازاى؟؟ زينهم وقال عامل فيها فكيك بقى: مش فى فتحات ورا فى الشاشة يا معلم.. أكيد بيدخلوا الجرنال منها العنتبلى: أكيد الناس دى فاضية وموراهاش أى حاجة تعملها زينهم: هو كدة بالضبط يا معلم.. بس ليه ده كله؟ العنتبلى: أصل الولية مراتى بتقولى بنتك جايلها عريس من النت زينهم: ألف مبروك يا معلم.. أكيد تقصد ان متقدملها صحفى العنتبلى وهو مبسوط: بجد ياد يا زينهم؟ زينهم: طبعا يا معلم.. ماهو زى ما قلتلك النت عبارة عن جرايد عالكمبيوتر.. يبقى قصدها ان واحد جرنالجى اتقدملها.. مبروووك يا معلم.. كدة ممكن تعمل دعاية للمحل بتاعك فى الجرنال.. وتطلع صورك انت والعجل فى صفحة الحوادث العنتبلى: طب العب يا وش السعد العب رمى زينهم الزهر ثم صرخ: ..دشراحت عليك يا معلم يـ تـ بـ ـع
???? زائر
موضوع: رد: عريـس من النّـت الإثنين 07 سبتمبر 2009, 1:41 am
الجـزء الثانـي [center][center]عفاف: يا ماما والنبي افهينى بقي عشان خاطرى.. العريس ده لقطة ومفيش زيه فى النت.. أنا حبيته من كتاباتهالأم: كتاباته؟؟؟ هو مؤلف؟؟؟عفاف: مش مؤلف قوى يعنى بس بيكتب عالنتالأم: وده بيكتب فى ايه بالضبط؟ عفاف: لالالالالالا يا ماما.. دا ما شاء الله عليه ماخلاش حاجة إلا لما كتب عنهاالأم بخبث : اااااااااااااااه.. مين يشهد للعروسة؟؟؟؟عفاف: لا والله ياماما بكلمك جدالأم بصوت عالى: اسمعى يا بت انتى أنا لا أعرف نت ولا كتابات.. أبوكى زمانه جاي دلوقتي هو بقى يتصرف معاكىعفاف في سرها: ماهيا دى المصيبة*******دخل المعلم حلاوة العنتبلى فى هذه اللحظة مبتهجا وقال: مساء الخيرالأم: يسعد مساك يا خويا.. تعالى بقى شفلك حل فى بنتك دىالعنتبلى: خير يا بنتى؟عفاف: أبدا يا بابا.. مش انتوا عاوزينى اتجوز.. اهو جالى عريس ومع كدة ماما مش عاجبهااااااااااالعنتبلى: أكيد مش عاجبها عشان جاهلة.. سيبك منها وقوليلى إيه الحكاية؟ عفاف: فى واحد طلب ايدى عن طريق النت.. وقالى انه جاد فى طلبه ومستعد يجيي فى أى وقتالعنتبلى: عال عال.. وإيه كمان؟؟؟؟عفاف: يعنى انت مش معارض يا بابا؟العنتبلى: واعارض ليه يا بنتى عفاف فى فرح: طب ارد عليه اقوله ايه؟العنتبلى وبصوت خشن: تردي علة مين؟ عفاف : على حاتم ياباباااااااااااااا العنتبلى وبصوت خشن: حااااااتم ميييييين؟ عفاف: العريس يا بابا العنتبلى: اااااااااااه مش تقوليلى كدة من الصبح.. قوليلى الأول هو بيكتب فى أنهي صفحة؟؟؟؟عفاف: ياااااااااااااه يابابا.. دة بيكتب فى صفحات كتيرة اوي اوي العنتبلى: عظيم.. وياترى بقى هو مشهور كدا يعني الناس تعرفه؟عفاف: أكيد يا بابا ده معروف جدا فى الجروبات والمنتدياتالعنتبلى: فين ياختى؟؟؟عفاف: فى المنتديات يا باباالعنتبلى: ودى تطلع إيه دى كمان؟؟عفاف: دى صفحات عالنت يا بابا بتجمع أعضاء كتير اوووي.. وبيتكلموا فى مواضيع كتير العنتبلى: يابت سيبك من النحوى ده وكلمينى كلام افهمهعفاف في سرها: بقى ده نحوى ياعالم؟عفاف: حاضر يا بابا.. المنتديات دى زى.. زى ايه قعدة المصطبة كده.. كل مجموعة واخدلها ركن وعمالين يتكلموا فى حاجة معينة.. وبيبقى لها شروط وقوانين معينة وكده يعنىالعنتبلى: ااااااااااااه فهمت.. يعنى زى سوق العجول كدهعفاف وقد فاض بها: عجول ايه بس يابا؟ بقى المنتدى زى سوق العجول؟العنتبلى: جرا ابه يابت انتي.. مش عاجباكى العجول يا بنت عواطف؟؟؟؟.. مش العجول دى الى بناكل منها عيش وربتك انتى واخواتك لغاية ما كبرتى وبقيتى عجلة زى أمك؟؟؟عفاف: طيب خلاص يا بابا.. المهم انه مشهور.. مشهور اووويالعنتبلى: طيب نيجى للمهم بقى؟.. هو عرفك منين؟؟؟شعرت عفاف بالرعب من السؤال فأجابك بسرعة: عفاف: لا يا بابا اوعى تفهمنى غلط.. والله ما شافنى ولا مرة حتى فى أى حتةالعنتبلى: ماطبعا يا بنتى لأنه لو كان شافك مكانشى اتقدم أصلاعفاف: وبعدين معاك بقى يا بابا.. هو أنا وحشة اوي كدا؟؟العنتبلى مبتسما إبتسامة صفراء: يابت بضحك معاكى.. انتى زى القمر بس عيبك الوحيد انك شبه أمكالأم: جرالك ايه يا راجل إنت ما تتعدل فى الكلام أحسنلك*******العنتبلى: احم احم.. كنا بنقول إيه يا عفاف؟؟؟عفاف: كنت بتسألنى هو عرفنى منين؟؟.. عموما هو عرفنى من النت.. واتقدملى عن طريق النت.. وإن شاء الله لو وافقتم هييجى يتقدملى على طولالعنتبلى: وماله يا بنتى خليه ييجى.. عرفك من النت عرفك من السلخانة.. مش فارقة المهم انه وقع على بووزهعفاف فى سرها: ياخوفى من ألفاظكم دى الى تطفش 100 عريس مش عريس واحد بسالعنتبلى: قوليله ييجى يوم الجمعة بعد العصرعفاف مسرورة: حاضر يا بابا هقوله حالا ودخلت مسرعة إلى حجرتها فاستعجب المعلم حلاوة العنتبلى وسألها: هتعملى إيه يا بت؟؟؟؟عفاف: هقوله يا باباالعنتبلى: انتى يا بت أخذتى التليفون عندك؟؟؟؟عفاف: لا يا بابا أبدااااااااالعنتبلى: امال هتقوليله إزاى من عندك؟ عفاف: هبعتله إيميلصرخ الأب فجأة بصوت مزعج وعالى: وإيه الى جاب الواد إيميل عندك فى الأوضة؟؟عفاف: يا بابا اهدى إيميل مين بس ده الى عندى.. أنا أقصد هبعتله جواب على النت تذكر العنتبلى حواره مع زينهم والورق الذى يدخل من خلف الشاشة فقال: ااااااااااه.. أنا بحسب.. المهم بلغيه بالميعاد وقبل أن يغادر إلتفت إليها قائلا: بقولك إيه يا عفاف.. بعد ما تكتبى الجواب حطيه بالراحة عشان الشاشة ما تنفجرشى تابعته عفاف بنظرات الدهشة والحيرة وهى تقول فى نفسها: احط إيه وشاشة إيه دى الى هتنفجر؟.. يارررربي *******
يـ تـ بـ ـع..[/center][/center]
???? زائر
موضوع: رد: عريـس من النّـت الثلاثاء 29 ديسمبر 2009, 7:20 pm
دا انا تعبت من القرايه يا راجل ..طبعا انته متعبيتش عشان واخدها كوبى وبسطت ههههههههههههه..مشكور والله حبيبى على المجهود
???? زائر
موضوع: رد: عريـس من النّـت الثلاثاء 09 فبراير 2010, 7:27 pm
تسلم ايدك
???? زائر
موضوع: رد: عريـس من النّـت الجمعة 02 يوليو 2010, 10:55 am
الرئيسية
موضوع: عريـس من النّـت 
الجمعة 28 أغسطس 2009, 5:57 pm
