هؤلاء مايطلقون عليهم زملكاويه

[center]ده اول موضوع ليه بعد
ماغبت عن المنتدا مده طويله
وطبعا لانى بحب الزمالك حبيت يكون اول
موضوع ليه عنه
وحبيت اعرفالعيبه بتوع الزمالك للاعضاء
وهما يحكمو لان بجد انا حزين على الزمالك
نعالو نشوف مين هما لعيبه الزمالك

مركز ( بوابة المرمى ) فعلا الناس اللي في المركز أكتر ناس بتستحمل قرف
الفرقة كلها زي البواب اللي شايل هموم العمارة كلها يمسح السلم ويمسح
العربيات ويجيب الطلبات للعمارة كلها وفي نفس الوقت مايسبهاش عشان يحرسها
من السرقة !! ملحوظة ( الإستنساخ لم ينجح في مصر )1
1- عبد الواحد
السيد : أحسن من قام بحراسة البوابة بس عنده عقدة إسمها الخروج من المرمى
لو أي كورة عرضية يلزق في الجون زي مايكون مربوط في العارضة بحبل خفي (بس
الوحيد اللي يصلح للإستمرار في الزمالك ولو رحل تبقي خسارة كبيرة جدا)
2-
محمد عبد المنصف : تاني أحسن من قام بحراسة البوابة وهو عامة بيبقي في
الطيلمانة بيلبس شوية إجوان عجب ويصد كور مايصدهاش غير بوفون (غالباْ
ملبوس)
3- عماد السيد : ماعرفش حد بالإسم دا!!!
ولكن ....
تحول إلي كبد ملئ بالسموم غير قادر علي آداء وظائفه يفشل في التخلص من
السموم (الأخطاء) في كل مرة يتعرض فيها الجسم (الزمالك) للمرض (الخطر)
مركز
( كبد الدفاع ) قلب الدفاع سابقاْْ زمان كان إسمه قلب الدفاع وأعتقد عشان
حاجتين إنه أولاْ يكون راجل وعنده قلب جامد وثانياْ يكون عنده إحساس
بمكانه في الملعب.
4 - هاني سعيد: الواحد مش عارف إنت مع مين بالظبط بس أكيد قصير بالنسبة لليبرو (بردو مهم للفرقة)
5-
محمود فتح الله: مدافع كويس لكن قلبه قلب فار دايما يرجع قصاد المهاجم مش
عارف خايف يعرقله ولا خايف يرقصه بس في الحالتين خايف (بردو مهم للفرقة)
6- أحمد مجدي: اللي عملك مدافع ظلمك واللي أساسا لعبك كورة ظلمك أكتر (لاتعليق)
7- عمرو الصفتي: قلب أسد ودماغ عصفورة وجسم ... (غالبا تجربة هندسة وراثية)
8- كريم ذكري: حواديت وحكايات عن ولد جاي من المصري وبعد كدة بخ (مش مفهوم)
9-
وسام العابدي: قلب دفاع منتخب تونس بطولة أفريقيا 2004 اللي أخدتها تونس
ماتعرفش هو كويس ولا وحش (ياترى العيب في مين؟ أكيد مش هانعرف)
10- عمرو عادل : ماعرفش حد بالإسم دا
مركز
( الظهير الخفي ) ... كان إسمه زمان الأيمن لكن مفيش أوفرات بتترفع بالرجل
اليمين من المكان دا خالص عشان كدة أصبح إسمه الخفي وبردو لإن لو عايز
تهجم علي الزمالك هجمة عنترية فأنا برشحلك المكان دا بكل جوارحي الرقابه
هاتلاقيها خفيفة ظريفة لا تتعدى شد من الفانلة (طبعا مش لدرجة إنذار) أو
تلامس خفيف (يريح عليك) ومش هاتلاقي أي إشتراك في الأوفر لإن الظهير الخفي
بيقف علي بعد 5 متر مكعب من الكورة (حقيقة علمية)
11- أحمد غانم
سلطان: عنده إستعداد يجري 120 دقيقة بس ماتطلبش منه حاجات قمة في الصعوبة
1- يرفع كورة بالمقاس 2- يرفع عينه وهو بيجري 3 - يعمل فاول تكتيكي (يعني
فاول يوقف بيه اللعب مش يطرد فيه يارب يكون بيقرأ عشان يتعلم)
12-
محمد عبد الله: لو أخد الكورة في منطقة الخصم ولوحده وممكن يرفع بكل سهولة
تفتكر هايرفعها؟ تبقي متفائل هايدور علي أقرب مدافع ويرقصه ويقف بعدها يبص
للجمهور شفته أنا رقصته إزاي وبعدها يرفع وتكون كل مدافعين الخصم جالهم
إنذار علي يد محضر إنه هايرفع فتتقطع (لاعب إستعراضي يصلح كممثل لا كظهير
أيمن)
13- حازم إمام : ماعرفش حد بالإسم دا
مركز (الظهير
المتصابي) .. زي العجوز المتصابي بالظبط بيتظاهروا بكل أفعال فترة
المراهقة رغم إنها ولت وعدت من زمان ينزل الماتش يرفع ويشوط ويغطي ويدافع
ويهاجم وفجأة وبدون سابق إنذار المفعول ينتهي ويبتدي يحس بتقل في رجليه
كأنه خلاص هايموت بس يبقي فرحان بالشويتين اللي عملهم
14- أسامة حسن: تقيل تقيل تقيل يامجنني (مع الإعتذار للسندريلا)
15
- علاء علي: لو تفتح صفحة الظهير الأيسر في تاريخ الزمالك هاتلاقي إن
الصفات الجسمانية والعقلية للمركز دا لم تتغير منذ عهد مينا موحد القطرين
- (قصير - جسمه ضعيف - لايجيد اللعب في مركز الظهير الأيسر) إذن العيب مش
فيه لإنه لم يشذ عن القاعدة
16- ريكاردو: ليه اللعيب دا محترف؟
ليه مايكونش عامل نفسه محترف وهو في الأساس شخص من 70 مليون شخص عايشين في
البلد (إحتمال وارد لإن إيه اللي هايخلي لعيب يسيب البرازيل ويجي يبتدي
حياته في مصر ؟ مش شايفينها غريبة شوية؟)
مركز (الوسط المشنافع)
المدافع سابقاْ أو (لاعبي الإنتكاس) الإرتكاز سابقا .. أيوة مشنافع
وإنتكاس، السبعة اللي تحت دول أكتر من نصهم عايز إعدام و الباقي عايز
إعادة تأهيل ويمكن واحد أو إتنين وبقول ممكن يجي منهم مع الوقت اللي هو مش
موجود أصلاْ ْ
17- أيمن عبد العزيز: فرعون تركيا القادم برياح
التغيير والثورة التركية في الكورة المصرية، وتعال ياعم إتفرج في الملعب
... إيه دا!! إيه اللي أنا شايفه دا!! مين دا؟ إقفل التلفزيون بدل ماخش
أضربه!! (تايه، باصات مقطوعة كما لو إنه بيلعب بعين واحدة، هي الكورة في
تركيا بقت كدة؟؟)
18- محمد أبو العلا: دا بقي حكاية، هربانة منه
علي طول، لقيته في مره في برنامج هابط بيقولك أنا مش عارف هانضم إمتي
للمنتخب !!! يانهار مالوش لون!! إنت عايز تنضم للمنتخب !! طيب هاتنضم ليه
وعلي حساب مين دا بركات مش طايلها (عديم الإحساس بالمعنى الحرفي والشكلي
والعقلي والنظمي للكلمة)
19- أحمد عبد الرؤوف: ممكن يجي منه مع الوقت (إعادة تأهيل)
20- محمد إبراهيم: ممكن يجي منه مع الوقت (إعادة تأهيل)
21- علاء عبد الغني: اللعيب دا مات إكلينكيا في تصادم طائرة مع إتوبيس نقل عام في السعودية (جريدة صوت العقل الفيومية)
22- أحمد الميرغني: لو فضل جسمه بالشكل دا يبقي بلاش منه أحسن من دلوقتي ويبتدي يشوف نادي تاني (إعادة تأهيل)
23 - علاء كمال: ماعرفش حد بالإسم
مركز
(اللي هايعدلوا المايلة) .. صانع الألعاب سابقاْ .. زمان كان المكان دا
للعيب رايق بيبدع ويفنن ويباصي كورة مقشرة للهجامة والإرتكاز يأمنه لكن
دلوقتي مطلوب منه يدافع ويلتحم ويباصي ويرقص ويشوط ويجيب إجوان يعني من
الآخر يبقي فرقة كاملة (ملحوظة: سوبرمان وباتمان وفرافيرو إعتذروا عن
الإنضمام عشان الجو في مش مناسب للطيران طوال أيام السنة)
24-
شيكابالا : الولد بيموت بالراحة الناس بتحمله أكبر من طاقته ولإنه مش زي
بقية الأبطال مابيقولش لأ وبيقعد يحارب في الملعب لوحده بس لاحظت في ماتش
الأهلي اللي فات إنه بيلعب من غير نفس يتهئ لي إنه إبتدي يزهق
25- محمود سمير: ماعرفش حد بالإسم دا
مركز
(فاقدي الذاكرة) الهجوم سابقاْ .. يتميز لاعبو هذا المركز بالفقدان الجزئي
وفي بعض الأحيان الكلي للذاكرة فلايتذكروا أين هم أو ماذا يفعلون في
الملعب أو مين الناس اللي لابسة أبيض دي أو أصلاْ إيه البتاعة الأبيض في
إسود دي اللي هم قاعدين بيجروا وراها 90 دقيقة دا لو جريوا أساساْ!!!!
26-
أجوجو : (المصارعة هي الحل) مفيش حد ينكر إن جسم أجوجو من أكبر مميزاته في
الإلتحامات والكرات العالية لكن ...... وآه من الكلمة دي - اللمسة الأخيرة

لما شفت أجوجو في الملعب عرفت المعنى الحقيقي للكلمة دي وعرفت ليه
ماراحش نادي كبير في أوروبا رغم لياقته البدنية العالية بس الندم مايفيدش
(مهاجم بدون فعالية زي القطة المشمشية حلوة بس شقية)
27- جمال
حمزة : واحد صاحبي قالها لي (جمال لما يسترجل عامل زي رونالدينهو لما
يتدلع) لعيب ماعندوش غيرة علي الفانلة ولا حتى بيبذل مجهود أراهن إنه
بنسبة 99 % ماعرقش في ماتش الأهلي وبس طالع يشاور علي البادج ويبوس
الفانلة وحركات مابنشوفهاش غير في مصر وفي الزمالك علي وجه الخصوص (لو مشي
مش هازعل ولو قعد مش هازعل عشان في الحالتين هو مش موجود)
28- مصطفي جعفر: ينفع إحتياطي لكن أساسي لأ وألف لأ (أكبر دليل علي صعوبة الموقف في الزمالك)
29- عبد الحليم علي: وادعاْ يا من كنت صديقي (غير مأسوف عليه لقد إنتهي)
30- شريف أشرف: المستقبل بيد الله والحاضر لا يشفع فلتستمر لعل وعسى

[/center]

فعلا حالهم يبكى

معلش معلش يمكن يمكن يمكن يمكن ولحد بكره يمكن حالهم يتعدل

Sad

من قلبى

يا خسارة الزمالكويه

مفيش زملكاوى يوحد ربه فى المنتدى

ههههههههههههههههههههههههههههههههههههههه

اهلاوية بتواسينى

تسلمى لمواساتك

وانا ايضا اواسيكى لهزيمه الاهلى انهاردة

فرررررررررصه سعيدة

هههههههههههههههههههههههههههههههه

lol!

عدد المساهمات : 54 تاريخ التسجيل : 30/06/2009

يافلسطينى انا زملكاوووووووووووووووووووووووووووووووويه زيك
وبقولك الزمالك اكبر من اى لاعيب وان شاء الله يفرحنا cheers

زمالك يا كوز ديما منحوس والله لو جيبتوا بتسيتو من زمان ورونالدوا واى حد حته لو جيبتوا ناس ما توا من ميت سنه برده الاهلى عمكم يا حتت Exclamation

الزمالك يعنى العو وانتو بتخافو من العو يعنى انتو بتخافو من الزمالك يعنى الزمالك عمكو وحارق دمكو Twisted Evil

الزمالك يعنى العو وانتو بتخافو من العو يعنى انتو بتخافو من الزمالك يعنى الزمالك عمكو وحارق دمكو Twisted Evil

عدد المساهمات : 729 تاريخ التسجيل : 19/02/2009

موضوع مميز
بشكرك على مجهودك دا وفى انتظار المزيد

زائر

هما دول الزمالكاويه مش فالحين غير تشتموا اللعيبه و بس خدوا العبره من مثلكم الاعلى جمهور االاهلى هؤلاء مايطلقون عليهم زملكاويه Icon_twisted

» ماهو الحب في نظر هؤلاء
» العشرة الذين تصلى عليهم الاملائكة